Ұстаздың қашан да өз шәкірттерінің білім деңгейі мен жетістіктеріне қарай мәртебесі, мерейі артады. Аяқталған оқу жылы №32 Қасым Аманжолов атындағы жалпы орта мектебі ұстаздары мен оқушылары үшін қуанышты жеңісті, жемісті жыл болды.ҰБТ нәтижесі бойынша 11 сыныпты бітіруші түлектер:
Махамбет Сейдахмет — 126 балл
Ергешбай Мадина — 120 балл
Махамбет Нұрымбет — 113 балл
Акрамова Сабина — 112 балл жинап, алтын белгі иегері атанды. Мектеп директоры Жолдасбекова Жамиля Амантайқызының қатысуымен өткен аттестатты салтанатты түрде табыстау жиынында білім ордасының мақтаныштарына арнайы сертификаттар табысталды. Білек пен бірді жықпай, біліммен мыңды жығатын жаңа дәуір жастарына, жас талапкерлерге өздері көздеген маман иегерлері атанып, мақсатта биік шыңдарда көрінулеріне тілектеспіз.
Сондай-ақ, Сарыағаш ауданы әкімі Арман Абдуллаев «Алтын белгі» иегерлерін арнайы марапаттап, алғыс хаттар және бағалы сыйлықтар табыстады.
– Білімді де дарынды жастар – еліміздің болашағы. Бұл марапат сіздердің үлкен жетістіктеріңіздің басы ғана. Ақылды әрі еңбекқор адамның алмайтын қамалы, бағындырмайтын белесі жоқ. Сіздердің жаңа биіктерге шығып, еліміздің дамуы мен көркеюіне үлес қосатын мықты маман болатындарыңызға кәміл сенеміз! Халқымызды жарқын болашаққа жетелейтін де, жеткізетін де өздеріңіз, – деп аудан әкімі Арман Абдуллаев жеткен жетістіктерін бағалап және үлкен өмірге басып жатқан қадамдарына сәттілік тіледі.
Сарыағаш ауданында биылғы оқу жылында негізгі мектепті 3093 оқушы тәмамдады. Соның ішінде, аудан бойынша барлығы 158 оқушы барлық талаптарды орындап, яғни үздік баға алып, «Алтын белгі» белгісінің иесі атанды. Айта кетерлік жайт Сарыағаш ауданының түлектері оқу үлгерімі жағынан жылдан жылға жоғары көрсеткіштер көрсетуде.
