Бүгін Ақсукент ауылдық округінде орналасқан №61 Сүйерхан Базарбаев атындағы негізгі орта мектебі жанынан 300 орындыққа арналған жаңа ғимарат ашылып, пайдаланысқа берілді.
2012 жылы 200 орындыққа арналған мектеп салынған ғимаратта 800-ден аса оқушы білім алды. Бала санының артуына байланысты, 2019 жылы мектепке 300 орындық қосымша құрылысы басталып, заманауи оқу кабинеттерімен жабдықталған ғимарат бүгін оқу жылының соңында ашылды.
Ашылу салтанатына аудан әкімінің міндетін уақытша атқарушы Б.Хасанов, «AMANAT» партиясы Сайрам аудандық филиалының төрағасы А.Әбдіқадіров, аудандық мәслихаттың төрағасы Ш.Халмурадов және аудандық адами әлеуетті дамыту бөлімінің басшысы Г.Тынымбаева қатысты.
Бахытбек Сембекұлы:
— Білім саласы қашанда басты назарда. Ауданымызда 2022 жылы басталған 2 мектеп құрылысы жүргізілуде. Биыл «Жайлы мектеп» жобасы аясында 3 мектептің құрылысын бастау жоспарлануда. Сонымен бірге №14 М.Сапарбаев атындағы жалпы орта мектебінің қосымша құрылысы да іске қосылуға дайындалуда.
Аудандық білім мекемелерінің материалдық базасын жақсартуға қаржы қаралып, 21 заманауи пәндік кабинет жабдықталды.
Құрметті оқушылар жаңа мектепте терең білім нәрімен сусындап, оқу жылын жақсы аяқтауларыңа, жазғы демалысты сәтті өткізіп, білім мен тәрбие бойынша алдыңғы қатарлы мектептер қатарынан көрінулеріңізге тілектеспін.
Адам өміріндегі сарқылмас қазына — ол білім. Адам баласы барлық арман, мақсаттарына тек білім арқылы ғана жете алады. Сондықтан, осындай жаңа ғимаратта білім алып, әрқайсысыларыңыз үздік түлек атаныңыздар. Ел ертеңі Сіздерсіздер, қымбатты шәкірттер, қиялдарыңыз ұшқыр болып, қанаттарыңыз талмасын!
Осы оқу жылы біздің оқушыларға өз қабілеттері мен таланттарын көрсетуге мүмкіндік берсін деп тілеймін.
Құрметті ұстаздар, сіздердің қажырлы еңбектеріңізде зор денсаулық, шығармашылық шабыт, білім жолында жаңа жетістіктерге жетулеріңізді тілеймін!, — деген ізгі тілегін білдірді.
Мұнан кейін, балалардың ән-би өнерлерін тамашалаған басшылар ғимараттың ішін аралап, Астана қаласындағы «Бәйтерек» монументін тұрғызған сәулетшілерінің бірі Сүйерхан Базарбаевтың өмірбаяны мен еңбек жолдарына арналған мұражай, бастауыш және оқу сынып бөлмелерімен танысты.
