Шымкенттің сот қызметкерлері келер ұрпаққа жолдау жазып қалдырды

Қасиетті жұма күні Шымкенттің сот қызметкерлері қалаға қарасты Сайрам ауылының маңында бір игі іс атқарды. Нақтырақ айтсам, қалалық соттың ұйымдастыруымен «МӘРТӨБЕ тарихи кешенінде» сақтық шараларын қатаң сақтай отырып, өткен ғасырларда Қазақ хандары мен билері жиын өткізіп, ел тағдырына қатысты шешімдер шығарған, «Жеті жарғыға» мөр басылған шежірелі Мәртөбенің Қазақстан тарихындағы орнын айшықтап, көпшілікке таныту мақсатында Рухани жаңғыру аясында тарихи шара өтті.
Оған қалалық соттың төрағасы Е.Рахымбеков пен кала әкімі М.Әйтенов, мәслихат хатшысы, Билер кеңесінің мүшелері мен сот қызметкерлері және БАҚ өкілдері қатысты.
Жиынды қалалық соттың алқа төрағасы Е.Жанғазин ашып: «Өздеріңізге мәлім, былтыр 23 тамыз күні Конституция мерекесі қарсаңында киелі Мәртөбенің тарихтағы орнын айшықтау мақсатында Шымкент қалалық сотында «Қазақ дала парламентінің түп қазығы – МӘРТӨБЕ» атты конференция өткізген едік. Конференцияда зиялы қауым өкілдері, тарихшы-ғалымдар, заңгерлер қатысып баяндама жасаған болатын.
Конференцияны төраға Е.Рахымбеков қорытындылап, — «Тәуке хан «Жеті жарғыны» жазып, артына өшпестей із қалдырды. Билерден қалған тарихи-мәдени мұраны зерттеп, жас ұрпақтың санасына сіңіру үшін, қалалық сот алдағы уақытта Сіздермен бірлесіп, Мәртөбенің мәртебесін көтеруді жоспарлап отыр. Осы мақсатта Мәртөбеде басқосу барысында сот қызметкерлерінің атынан болашақ заңгерлерге жазылған Үндеуді капсулаға салып, кейінгі ұрпаққа қалдырсақ», — деген болатын.
Соған байланысты, бүгінгі жиынның мақсаты, көне Сайрам маңындағы тарихи орын Мәртөбеде болашақ заңгерлерге арналып «Келер ұрпаққа жолдау» жазылған капсуланы салу рәсімін салтанатты жағдайда атқару» — деді.
Алғаш болып сөйлеген Шымкент қаласының әкімі М.Әйтенов, шараның маңыздылығына тоқталып, Мәртөбе – ел тарихында айрықша мәнге ие тарихи орын. «Мәртөбе – елдігіміздің мәртебесін, бірлігіміздің берекесін айшықтаған жер. Бұл аумақта Дала Парламентінің келелі жиындары өтіп, маңызды шешімдер қабылданғанын айтып өтті.
Жиында сөз алған қалалық соттың жанындағы Билер кеңесі орталығының жетекшісі А.Елшібаев: «Ата заңымыздың қалыптасып, жетілуіне ықпал еткен Тәуке ханның «Жеті жарғысы» мәйегі мықты мемлекет құруға, оның құқықтық ережелері мен әдет-ғұрыптарын заңдастыруға айрықша үлес қосқанын және Билер сотының заман талабына сай дамып, ел билеудің өнегелі жолына айналғанын айтып жеткізді.
Одан кейін, мен қаладағы сот қызметкерлерінің болашақ заңгерлерге арнап «Келер ұрпаққа жолдауда» жазылған ақпаратты қатысушыларға баяндап бердім.
Іс-шараның соңында Е.Рахымбеков пен М.Әйтенов «Келер ұрпаққа жолдау» жазылған капсуланы арнайы орнатылған қондырғыға салып, үстін мрамор плитамен жапты.
Сот қызметкерлері осындай игі іс атқарып, Қазақтың тарихи Мәртөбесін көпшілкке насихаттап, болашақ заңгерлерге жолдауды аманат етті.