5-8 сынып оқушыларына арналған «ProEco» экологиялық жобалар конкурсының республикалық кезеңіне 4 жоба қатысып, 3 жоба жүлделі орындарға ие болды. Аталған жобада Түркістан облысының намысын қорғаған жеңімпаз шәкірттер қатарында: Кентау қаласы, Әл-Фараби атындағы № 14 мектеп-гимназиясының 8-сынып оқушысы Қанай Қаныш та бар. Ол республикалық жобада жүлделі ІІ орынға ие болды. Сарығаш ауданы, №3 М. Ломоносов жалпы орта мектебінің 7-сынып оқушысы Жорабек Зайна да байқауда жүлделі ІІ орынға жайғасты. Бұдан өзге, Бәйдібек ауданы, М. Әуезов атындағы IT – мектеп-лицейінің 8-сынып оқушысы Мақсат Әдемі жүлделі ІІІ орынға ие болды. Қатысушылар төрт бағыт бойынша жұмыстарын ұсынды. «Туған өлке табиғаты», «Мені қоршаған әлем – ғажайып әлем», «Үздік экологиялық бастама», «Таза қала сізден басталады». Ережеге сай жеңімпаздар мен жүлдегерлер жас ерекшеліктеріне қарай 5-6 және 7-8 сынып аралығында анықталған.
Конкурстың мақсаты оқушыларды әлеуметтік жауапкершілікке тәрбиелеу және экологиялық сауаттылықты арттыру, экологиялық мәдениет қалыптастыру, табиғатты қорғау қызметіне бейімдеу, мектеп оқушыларының интеллектуалдық –шығармашылық әлеуетін ынталандыру болып саналады. Бұл байқауға республиканың Астана, Шымкент, Алматы қалаларының және 14 облыстың командалары қатысты. Айта кетсек, 5-8 сынып оқушыларына арналған «ProEco»республикалық экологиялық жобалар байқауы басталғалы, сайысқа еліміздің барлық өңірінен 100-ден астам оқушылары қатысқан. Конкурс ұйымдастырушыларының айтуынша,байқау оқушыларды әлеуметтік жауапкершілікке тәрбиелеп, экологиялық сауаттылықты арттырып, мәдениетті қалыптастыруға бағытталған.
Жеңімпаз шәкірттерді дайындап, бәйгеге қосқан пән мұғалімдерін құттықтаймыз. Облыстың намысын қорғап, қатысушылардың басым бөлігі респуликалық додада жүлделі орын алғаны үлкен жетістік болып саналады.
