Шымкентте ХҚКО-ға келушілерге тәттілер мен кәдесыйлар таратылды. «Азаматтарға арналған үкімет» мемлекеттік корпорациясының Шымкент қаласы бойынша филиалы «Шын жүректен» акциясының бастамашысы болды.
Шымкент қаласы бойынша «Азаматтарға арналған үкімет» мемлекеттік корпорациясының ресми өкілі Алтынай Татаеваның айтуынша, аталмыш іс-шара еліміздің барша азаматтарының достығы мен бірлігін қолдау, сондай-ақ қызмет алушылардың көңіл-күйін көтеру мақсатында Қазақстан халықтарының бірлігі күніне орай ұйымдастырылған.
«Бүгін мен ХҚКО-ға мемлекеттік қызметті алуға келдім. Орталық қызметкерлері менің көңіл-күйімді көтеріп, маған шоколад пен қазақи домбыра кәдесыйын сыйлады. Бұл мейірімділіктің нышаны. Қызметкерлер тұрғындарды күлімсіреп, жақсы көңіл күймен қарсы алды. Сонымен қатар бірлік күні мерекесімен құттықтады. Өз кезегінде мен барлық қазақстандықтарды осы тамаша мейраммен құттықтап, ашық аспан, жақсылық пен бейбіт өмір тілеймін», — деп атап өтті Татьяна Корчагина.
«Қазақстан халықтарының бірлігі күні — ең жарқын мерекелердің бірі. Біздің филиалда көптеген ұлт өкілдері жұмыс істейтінін атап өткім келеді. Олардың ішінде қазақ, орыс, неміс, әзірбайжан, түрік, корей, шешен, татар және өзбек ұлтының азаматтарыда бар. Біздің қызметкерлер өте ұйымшыл, олар өз ісіне адал және әр келген қызмет алушыға мәселелерді шешуге көмектесуге әрқашан дайын», — деді Шымкент қаласы бойынша «Азаматтарға арналған үкімет» филиалының директоры Дәрімбет Баймбетов.
