ШЫМКЕНТ: ҚОҒАМДЫҚ КӨЛІКТЕРГЕ БАҚЫЛАУ КҮШЕЙТІЛЕДІ

8 сәуірде Шымкент қаласында ауыр жол-көлік оқиғасы орын алып, төрт адам қайтыс болды. Қазіргі таңда құқық қорғау органдары тарапынан тергеу жүргізілуде. Аталмыш оқиғаға байланысты Шымкент қалалық жолаушылар көлігі және автомобиль жолдары басқарма басшысы Мұқтар Қоқанбаев барлық тасымалдаушы компания басшыларымен арнайы жедел жиын өткізді.  Мұхтар Қоқанбаев автобус паркі басшыларына жүргізушілерді қайта аттестаттаудан өткізу қажеттігін айтты. Жауаптылардың сөзінше, оқиғаға себеп болған автобус пен басқа да қоғамдық көліктер толық тексеруден өткен.

Мұхтар Қоқанбаев, Шымкент қаласы жолаушылар көлігі және автомобиль жолдары басқармасының басшысы: «Бұдан кейін тасымалдаушыларға талап қатты күшейтіледі. Осы жерде барлық тасымалдаушы қатысып отыр. Бізде қалада тасымалдаумен айналысатын 10 компания бар. Рейдтік іс-шара ұйымдастырамыз. Кезектен тыс аттестация өткізу керек, шұғыл түрде, барлық жүргізушілерге».
Жиын барысында басқарма тарапынан тасымалдаушы компанияларға аталған оқиға бойынша жүргізушілердің назарына жеткізу, жол жүрісі, жолаушылар тасымалдау қағидаларының талаптары мен жүргізушінің міндеттері туралы қосымша және тұрақты түрде нұсқаулықтарды өткізу, жүргізушілер құрамы арасында кезектен тыс аттестациялау шараларын өткізу, тұрақты түрде бағыттардағы желілік бақылауды күшейту тапсырылды.

Сондай-ақ қаза тапқан отбасылардың жақындарына автопарк басшысы тарапынан жаназа шығындарын өтеуге көмек берілетінін атап өтті.

Айта кетейік, қазіргі таңда Шымкент қаласында 77 тұрақты қалалық маршрут қызмет көрсетеді, күнделікті маршруттарға 877 автобус шығады. Жеке меншік нысанындағы 10 компания жолаушыларды тасымалдау қызметін көрсетуде. Алдағы уақытта күшейтілген рейдтік жұмыстар атқарылып,компания басшыларына тиісті тапсырмалар берді.