Әлеуметтік желіде «Шымкент әкімдігі иттерді піштіруге 140 млн теңге бөлді» деген ақпарат тараған болатын. Бұл көпшіліктің ызасын тудырғаны жасырын емес. Осы мәселеге қатысты Шымкент қаласының ауыл шаруашылығы және ветеринария басқармасы БАҚ өкілдерін жинап, арнайы брифинг берді. Басқарма басшысы Ә.Жанбатыровтың айтуынша, ҚР Президентінің 2020 жылғы жолдауына сәйкес, ҚР Экология,геология және табиғи ресурстар министрлігінің 2022 жылғы 20 мамардағы «Қаңғыбас жануарларды вакицнациялау және стерилизациялау қағидаларын бекіту туралы» бұйрығын орындау мақсатында Шымкент қаласында іс-шаралар жоспары бекітілген. Жоспарға сай, қала аумағындағы 20 мыңға жуық қаңғыбас ит-мысықтарды аулау үшін қазынадан 139,5 млн теңге қаржы қаралған. Соның ішінде қаңғыбас ит-мысықтардың өсімін тұрақтандыру мақсатында 84 млн теңге бөлінген. Бұл қаржыға 8400-ге тарта ит-мысықтарға піштіру (қастрация), вакцинациялау, стрелизациялау жұмыстары жүргізіледі. Осы мәліметтер құлақтарына арнайы орнатылған чиптерге жазылады екен. Жалпы әрбір ит-мысыққа 10 мың теңге шамасында ақша жұмсалады. Мамандардың арнайы бақылауынан өтіп, қоршаған ортаға қауіпсіз екендігі анықталғаннан кейін ғана тіршілік ортасына қайта жіберіледі. Піштіру (кастрация) әдісі Шымкентте биыл алғаш рет қолданылмақ. Өсім көрсеткішін тұрақтандырудың тиімді әдісі Шымкенттен өзге, Алматы,Астана қалалары мен өзге де облыс орталықтарында жүзеге асырылады – дейді басқарма басшысы.
