Кентау қаласында футболдан 40 жастан асқан әуесқой ардагерлер арасында Копбаев Төрехан Батырбекұлының 60 жас мерей тойына арналған жарыс өтті. Спорттық сайыста 6 команда өзара бақ сынасты. Қатысушылардың айтуынша, оларды спортқа, футболға деген махаббат біріктіреді. Сондай-ақ, достарымен кездесіп, жақсы уақыт өткізуге мүмкіндік алады. «Ардагерлермен жиі жиналып, футбол ойнаймыз, керемет көңіл-күй аламыз. Әдемі кездесулер, жақсы қарым-қатынасты бізге осы турнир сыйлайды. Ойын қиын берілді. Қарсыластарымыз мықты команда, соңына дейін берілмей ойнадық. Мұндай спорттық шаралар ардагерлерді қолдап, оларға мереке сыйлайды» — деп жарыс қатысушысы, футбол ардагері Жолдыбаев Құрманбай өз ойымен бөлісті. Футбол әуесқойлары бір дауыстан, футбол – олар үшін өмір мәні екенін атап өтті. Сонымен қатар, бұл турнир ардагерлерді психологиялық және моральдық тұрғыдан қолдайтыны да айтылды.
Доп додасына қос командалар жоғарғы дайындықпен келгенін көрсетіп, тартысты өткен ойын нәтижесінде:
«Байсал» командасы — І орын
«Южный » командасы— ІІ орын
«Арман» командасы — ІІІ орын
Жеңімпаз атанған команда мен үздік деп танылғандар арнайы тағайындалған алғыс хаттар және сыйлықтармен марапатталды. Енді алдағы уақытта достық қарым-қатынасты арттыру үшін бұл игілікті шара жалғасын табатын болады.
Осы тұста спорт саласына қатысты тағы бір жаңалық! Енді спорт мектептерінің педагогтері мен жаттықтырушылары үшін апта сайынғы оқу жүктемесі 24 сағаттан 18 сағатқа дейін қысқартылады. Бұл туралы Мәдениет және спорт министрі Асхат Оралов кеңейтілген алқа отырысында айтқан еді. Министр мектеп-интернаттардың жаттықтырушы-оқытушыларына олардың біліктілігіне қарай 6 мың теңгеден 22 мың теңгеге дейін әр категория үшін үстемеақы енгізілетінін айтты. Бұл өзгерістер биыл күшіне енеді.
Асхат Оралов дене шынықтыру және спорт саласындағы қолданыстағы нормативтік құқықтық база талаптарға толық сәйкес келмейтінін және бұл ретте саланың нақты қажеттіліктері ескерілетінін, сондықтан министрлік қолданыстағы заң жобасына түзетулер енгізуді қолға алғанын айтты.
«Мемлекет басшысы балалар спортын дамытуға және педагог мамандығына қызығушылықты арттыруға көп көңіл бөледі. Осы ретте спорттық бағыттар назардан тыс қалмайды. Біз жаттықтырушы-оқытушыларға топтарды басқарғаны және спортшыларды жоғары тұрған спорт ұйымдарына, сондай-ақ спорттық атақтарға ұсынғаны үшін үстемеақылар мен қосымша ақылардың жаңа түрлерін енгізуді жоспарлап отырмыз. Біз бұл бағыттағы жұмысты жалғастырамыз және сала қызметкерлерін әлеуметтік тұрғыда қолдау үшін жаңа шешімдер қабылдаймыз», деді Мәдениет және спорт министрі Асхат Оралов.
