Түркістан облысында ауыл шаруашылығына қолдауды күшейтуге ерекше мән берілген. Себебі өңір үшін бұл саланың орны ерекше. Облыс халқының 80 пайызға жуығы ауылда тұрады. Мыңдаған отбасы ауыл шаруашылығы арқылы өз-өздерін жұмыспен қамтып, елдің дамуына үлес қосып келеді.
Өткен жылы Түркістан облысында 805,3 млрд теңгенің ауыл шаруашылығы өнімдері өндіріліп, тиісті кезеңмен салыстырғанда 128,7 млрд теңгеге артты. 842,4 мың гектар жерге ауыл шаруашылығы дақылдары егілді. Мұнда ғылымға негізделген жаңа жобаларға да басымдық берілді. Солардың бірі – егістікті әртараптандыру. Осы бастама нәтижесінде көкөніс, бақша, картоп өнімдерінің түсімділігі орташа 20 центнерге өсіп, өткен жылдан 500 мың тоннаға артты. 3,3 млн тонна өнім жиналып, рекордтық көрсеткішке қол жеткізілді.
Ал өңірде ауыспалы егістің көлемі 179,9 мың гектарға арттырылып, жылыжай алаңы 1 300 гектарға кеңейтілді. Тіпті жаңадан 105,3 гектарға жылыжай салынып, жалпы алаңы 1 440 гектарға кеңейді. Республикадағы жылыжайлардың 71 пайызы Түркістан өңірінде орналасқан.
Бүгінде Түркістан қаласы айналасында азық-түлік белдеуін құру жобасы шеңберінде 11 мың гектар аумақта өнімділігі жоғары жаңбырлатып суғару технологиясы ендіріліп жатыр. Өңірде 163 шағын шаруашылықтардан тұратын 2 кооператив құру есебінен 2 мың гектарға 47 бірлік жаңбырлатып суару қондырғылары орнатылды. «Бір алқаптан жылына 2-3 өнім алу» жобасы аясында 8,9 мың га 2878 жоба іске асырылып, 280 мың тонна көкөніс өнімі жиналды.
Республикада суармалы жерлердің 3/1 бөлігі облысқа тиесілі (548,2 мың га). Суармалы жерді тиімді пайдалану мақсатында Түркістан облысын әлеуметтік-экономикалық дамытудың кешенді жоспары аясында маңызды су нысандарының құрылыс-жөндеу жұмыстары қарқынды жүргізілуде. Оның ішінде «Түркістан магистралды каналын күрделі жөндеу» жобасының маңызы зор. Бұрын ағын су 43 пайызға фильтрациялық шығынға ұшыраса, бүгінде 43 шақырым каналда бетондау жұмыстарының нәтижесінде 22 млн текше метр су үнемделіп, 1,5 шақырым канал бойы абаттандырылды. Жоба толық іске асқанда 60 млн текше метр су үнемделеді. «Кеңсай — Қосқорған — 2» су қоймасы жобасы биыл пайдалануға беріледі. Ол арқылы 34 млн текше метр ағын су жеткізілмек. Жалпы, өңірді суландыру бағытында ауқымды жобалар жүзеге асырыла береді.
Мал шаруашылығында мал басы мен өнімділік 4-5 пайызға артып, 291,4 млрд теңгеге өнім өндірілді. Өсім 103,5 пайызға жетті. Ет экспорты бойынша облыс республикада 1-орында. Елімізде экспортқа шығарылатын ірі қара мал етінің 75 пайызы, қой етінің 40 пайызы Түркістан облысына тиесілі. Биылдың өзінде 24 мың тонна ірі қара мал, 2,3 мың тонна қой еттері экспортталды. 4,1 млн тонна мал азығы жиналып, жоспар 8 пайызға артығымен орындалды.
Егін жинау науқаны үшін және мал шаруашылығын дамытуға мемлекет тарапынан қолдау көрсетілуде. Биыл барлығы 32,2 млрд теңге субсидия берілді.
