Футболдан Қазақстан премьер-лигасының аяқталуына 2 тур қалды. 24-турда Түркістан облысының «Мақтаарал» командасы «Түркістан арена» стадионында еліміздің былтырғы чемпионы «Тобылды» қабылдады.
Биыл да бірінші орыннан үмітін үзбеген қостанайлықтар бұл бәсекеде үш ұпай олжалауды көздеген. Бірақ «Мақтаарал» футболшылары қайсарлық танытты. Ойынның 6-минутында Носко есеп ашса, Юденков 45-минутта есепті еселеді. Чемпиондар тек бір голмен қарымта қайтарды. Осылайша, 4 тур бойы жеңіске жетіп келе жатқан «Мақтаарал» «Қызылжармен» он бірінші орынды бөлісіп тұр. Премьер-лигада қалу мүмкіндігі жоғары.
Өкінішке қарай, Түркістанның «Тұраны» сырт алаңда «Ақтөбеден» 2:3 есебімен жеңіліп қалды. Негізі ойын өте тартысты өткен. «Тұрандықтар» тәуір ойнаған. Бірақ, қақпаларына белгіленген екінші пенальти ойын тағдырын шешіп кетті.
29 қазанда «Тұран» мен «Мақтаарал» арасында «Оңтүстік дербиі» өтеді. Осы кездесуде премьер-лига жолдамасының тағдыры шешілуі мүмкін.
Осыған дейін, «Мақтаарал» бапкері Константин Горовенко командасының алты ойын бойы жеңілімегеніне қатысты пікір білдірген еді.
— Шынымды айтсам, өзге командаларға назар аудармаймыз. Әр матчты жақсы өткізуге тырысамыз, келесі ойынға дайындақты бастап кеттік. Статистика, әрине, көңіл көншітерлік,-деген еді ол.
Айта кетейік, футболдан Қазақстан чемпионатының 24-турында «Мақтаарал» ойыншылары «Тобылды» 2:1 есебімен жеңіп, турнирлік кестеде 12-орынға көтерілді. Еске салсақ, 14 қазанда футболдан Премьер-лига командалары арасындағы ел біріншілігінің 23-турының алғашқы ойын күні өткен еді. Аталған турдағы алғашқы кездесуде Оралдың «Ақжайығы» өз алаңында «Таразбен» 0:0 есебіне қанағат білдірді.Салдарынан оралдық клуб турнир кестесінде ең соңғы орынға түсіп қалды. Ал олардың басты қарсыласы — Түркістан облысының «Мақтаралы» сырт алаңда Ақтаудың «Каспийін» 4:2 есебімен тізе бүктірді. Осылайша қатарынан үшінші жеңісіне қол жеткізді. Нәтижесінде бірінші лигаға түсіп қалу қауіпті аймағынан шығып, он екінші орынға көтерілді. Еске салсақ, бұдан бұрын Қазақстан футбол құрамасының 2024 жылғы Еуропа чемпионаты іріктеу сатысындағы ойын кестесі анықталды.
