ҚР Үкіметінің «Түркістан облысындағы кейбір білім беру мен мәдениет ұйымдарына атау беру және атауын өзгерту туралы» №741 Қаулысына сәйкес, Алатау ауылдық округіне қарасты Екпінді жалпы орта мектебіне Төлепбек Назарбековтың есімі беруге арналған мерекелік жиын өтті.
Ауыл тумасы, облыстың ауыл шаруашылығы саласының дамуына үлес қосып, бірқатар лауазымды қызметтер атқарған Төлепбек Әбдіұлының есімін бүгінгі ұрпақ арасында ұлықтау мақсатында өткен шараға қатыстым. Мерекелік жиында Төлепбек Назарбековтың өмірдерегі, ел игілігі жолындағы атқарған еңбектері сөз болды. Еліміздің дамуында өзіндік қолтаңбасы бар азаматпен қызметтес болып, бірлесе еңбек еткендер естелік әңгімелер айтты.
1927 жылы 17 мамырда ОҚО Төлеби ауданының Екпінді ауылында дүниеге келген. Москвадағы Ленин орденді Тимирязев атындағы ауылшаруашылық академиясын бітіргеннен соң әртүрлі басшылық лауазымдарда қызметте болды: Тұрбат МТС-нің бас агрономы, аудандық ауыл шаруашылық инспекциясының бастығы, Қазақстан Компартиясы Қаратас аудандық комитетінің хатшысы, Қазақстан Компартиясы Оңтүстік Қазақстан облыстық комитеті ауыл шаруашылық бөлімінің меңгерушісі, облыстық кеңшарлар басқармасы бастығының орынбасары, кеңшар-ұжымшар аймақтық басқармасының бастығы, облыстық ауыл шаруашылық басқармасының бастығы, Қазақстан Компартиясы Бөген аудандық комитетінің бірінші хатшысы болды. 1976-1987 жылдары облыстық орман шаруашылығы басқармасының бастығы қызметінде жүріп дендробақтың салынып, көркеюіне үлкен үлес қосты. Халық Депутаттары Шымкент қалалық Кеңесінің 21 шақыруындағы 1992 жылғы 20 маусымдағы XIV сессиясының № 246 қаулысымен Т.Назарбековке, дендробақ және демалыс аймағын құрып, көріктендіруге қосқан зор үлесі үшін «Шымкент қаласының Құрметті азаматы» атағы берілді. Төлепбек Әбдіұлы саналы ғұмырын еліміздің өркендеуіне арнай білді. «Жақсының шарапаты жалпақ елге жетеді» деген, өңiрдiң әлеуметтiк-экономикалық әлеуетiн көтерудегі еңбегі әлі күнге дейін ел жадында. Төлепбек Назарбеков кезiнде Созақ және Бөген аудандарын басқарып, облыстық партия комитетiнiң хатшылығына дейiн көтерiлді. Әрқашан қызмет бабында әділдікті ту еткен азаматтығы жөнінде елi әлiге дейiн ерекше сезiммен еске алады.
Мерекелік жиын барысында Мәдениет үйінің қызметкерлері концерт қойып, мектеп фойесінде қоғам қайраткерінің бюсті салтанатты түрде ашылып, бабалар рухына құран бағышталды.
