Шымкенттегі қалалық клиникалық балалар ауруханасының енді өз лор бөлімшесі бар. Енді аймақтағы науқас балалар бұрынғыдай Астана мен Алматы қаласына сабылмайды. Алғаш рет ашылған бөлімшеде дәрігерлер, құлақ мұрын ауруларын өздері емдеп, науқастарға сапалы түрде қызмет көрсете алады.
Ағымдағы жылдың қазан айында ашылған бөлімшеде бүгінге дейін 60-қа жуық науқас емделіп шыққан. Отоларингология бөлімшесі 20 төсек орынға лайықталған.
Мұнда дәрігерлер құлақ, тамақ, мұрында кездесетін ауру түрлеріне диагностикалық тексерулер жасап, толық емдеу жұмыстарын жүргізеді.
Шымкент қалалық клиникалық балалар ауруханасының отоларингология бөлімшесінің меңгерушісі Ұлан Тәліппекұлының айтуынша, мұнда келетін науқастарды толық ем-домын алып шығады. Бұрынғылдай орталық қалаларға барып әуреленбейді. Білікті де білімді дәрігерлер мұнда келген әрбір науқасқа баса назар аударып, толық емін алып шығуына барлық жағдайын жасайды. Бөлімшемізге келіп жатқан науқастар қатары көп.
Жаңадан ашылған бөлімшедегі дәрігерлер операция жасауға да бейімделген. Сондықтан мұндағы дәрігерлер бұрынғыдай науқастарды Астана мен Алматыға сабылтпай, өздері емдеп, қажет жағдайда отаны да жасайды. Мамандардың сөзінше, құлақ мұрын ауруына шалдыққан науқастардың басым бөлігі операцияға мұқтаж болып келеді екен. Мәселен, соңғы бір айдың ішінде бөлімшеде емделіп шыққан науқастардың 90 пайызына дәрігерлер ота жасаған.
Шымкент қалалық клиникалық балалар ауруханасының ЛОР дәрігері Ерубай Мақсаттың сөзінше, мұнда көптеген ота түрі жасалады. Атап айтқанда, Септопластика, Вазотомия, Конхотомия, Мұрын қабыршықтарының оталары, Мұрын сүйектерінің репозициясы, Ринопластика, Эндоскопиялық оталар, Құлақ ауруларының оталары және де өзге күрделі операциялар жасалады.
Айта кетейік, құлақ мұрын аурларына дер кезінде диагноз қойып, оны емдеуде ауруханада қажетті жабдықтардың барлығы орнатылған. Емдеу мекемесінде операция жасауға арналған операциялық микрохирургиялық микроскопы, ЛОР комбайны сияқты барлық қажетті жабдықтар бар. Бөлімшеде дәрігерлер шұғыл және жоспарлы түрде емделетін науқастарды қабылдайды.
Мемлекет басшысының ұлт денсаулығын жақсарту туралы берген тапсырмасына сай Шымкентте осындай бірегей бөлімдер ашылуда. Онда барлық жағдай жасалынған. Алдағы цақытта материалдық базасы нығайа түспек.
