Түркістан облысының өнер және спорт саласының үздіктерінен құрылған команда ҚР Үкіметінің қолдауымен «Хабар» телеарнасы ұйымдастырып жатқан «Жеті қазына» Республикалық телевизиялық шоу бағдарламасына екінші кезеңіне қадам басты. Есте болса, Астана қаласында еліміздің барлық өңірінен өнер және спорт саласының үздіктері бақ сынайтын бағдарлама телеарнаның жаңа маусымында көрерменге жол тартқан болатын.
«Жеті қазына» мега-жобасында әр өңірден келген өнерпаздар мен спортшылар атадан балаға мұра болып келе жатқан ән, жыр-терме, күй, айтыс, күрес, қол күресі, арқан тартыс секілді жалпы сайыстың 10 түрінен бақ сынайды. Бағдарлама мақсаты ұлттық өнерімізді, ойындарымызды, құндылықтарымызды дамытып, қазіргі заман талабына сай жаңашаландырып, әр өңірдің өзіне тән дәстүрін өскелең ұрпаққа насихаттау болып табылады.Сонымен қатар облыстар арасындағы мәдени байланысты нығайту және өзара тәжірибе алмаса отырып, үздіктерді анықтап, көрерменге таныстыруды мақсат етеді.
«Хабар» Агенттігі» АҚ Басқарма Төрағасы Берік Уәли мырза өзінің әлеуметтік парақшасында «Бұл өнер додасы облыстар арасындағы мәдени байланыстарды нығайтуды және өзара тәжірибе алмаса отырып, үздіктерді анықтап, көрерменге таныстыруды көздейді. Барлығы 20 өңір арасында 10 сайыс өтеді. Жобаның өңірлерде көрінбей жүрген өнерпаздардың танылуына да септігі тимек» деп хабарлады.
Айта кетейік, бұған дейін Түркістандық өнерпаздар алғашқы кезеңде Қостанай облысының командасымен сайысқа түсіп, екінші кезеңге жолдама алған болатын. Алғашқы хабар 4 қыркүйектен бастап әр жексенбі сайын «Хабар» арнасынан көрсетіліп жатыр. Түркістандықтар, барша өнерпазға сәттілік тілей отырып, жерлестеріне жеңіс тұғырынан көріне беруге тілек білдірді. «Жеті қазынаны» жобасындағы өңіріміздің командасына қолдау көрсетуге шақырды.
1644
