Отырар ауданында қазақтың заңғар жазушысы Мұхтар Әузовтың туғанына 125 жыл толуына орай «Мұхтар Әуезов мұрасы – ұлт қазынасы» атты арнайы іс шара өтті.
Көксарай ауылындағы жазушының өз атымен аталатын жалпы орта мектепте ұйымдастырылған жиын мектеп мұражайын тамашалаудан басталды. Мерекелік шараға қатысқан аудан әкімінің орынбасары А.Құлмаханов, аудандық мәслихат депутаты, мектеп директоры А.Сыздықәліге аудан әкімі Сәкен Сұлтанхановтың арнайы құттықтауын жеткізді. Сонымен қатар, Айдос Құлмаханұлы барша жиынға қатысушарды жазушының 125 жылдық мерей тойымен құттықтап, қазақтың болмысын күллі әлемге «Абай жолы» романы арқылы танытқан жазушы Мұхтар Әуезовтің мерейтойы – баршамызға ортақ. Сан салада қалам тербеген сөз зергерінің Алашқа сіңірген еңбегі де ерен. Ұлы тұлғаның мерейтойын кең көлемде атап өтуге арналған іс-шара бүгінгі ұрпақты рухани мұраларымен сусындатуға бағытталғандығын жеткізді.
Қазақтың заңғар жазушысы Шығыс Қазақстан облысы Абай ауданындағы Бөрілі деген жерде 1897 жылы дүниеге келген. Қазақстан ғылым академиясының академигі артына мол әрі бай мұра қалдырды. Қазақ КСР еңбек сіңірген ғылым қайраткерінің оқу-ағарту ісіне, драматургия саласына сіңірген еңбегі ұшан-теңіз. Оның «Абай жолы» романы – қазақ әдебиетінің ең атақты туындысы. Мұхтар Әуезовтің қазақ драматургиясы мен прозасындағы еңбектері талай ұрпаққа мұра болып қалары сөзсіз.Мұхтар Әуезов ұлттық театрдың дамуына көп еңбек сіңірді. Қазақ театрлары сахнасында жазушының өзінің пьесаларынан бөлек, оның аудармасындағы әлемдік, орыс және кеңес драматургиясының таңдаулы туындылары қойылады.
Мерекелік шара соңы естелікке суретке түсіп, концерттік бағдарламаға ұласты. Айта кетсек, осыған дейін ұлты үшін ұран тастап, Түркістанның саяси дамуына атсалысқан, түркі халықтарының рухани бірлігін сақтауға және тәуелсіздік идеясын бастаған тұлғаның өмір жолынан сыр шертетін арнайы көрме ұйымдастырылды. Қайраткер тұлғаның өмір жолынан сыр шертетін деректі фильм де көрсетілді.
