Түркістан қаласында Сейілхан Саттарханұлын еске алуға арналған бокстан жасөспірімдер арасындағы ашық турнир басталды. Республикалық деңгейде ұйымдастырылған сайысқа 12-13 жас аралығындағы 120 спортшы қатысуда.
Сейілхан Саттарханұлы – «Түркістан қаласының Құрметті азаматы», өнегелі өмірін шаһар дамуына арнаған жан. Олимпиада чемпионы Бекзат Саттархановтың әкесі. Әрі жастар арасындағы бокстың дамуында елеулі еңбек еткен азамат.
Жарыстың ашылуында сөз сөйлеген қала әкімінің орынбасары Ерлан Бақытжанұлы: «Сейілхан ағамыздың өнегелі өмірінде жасаған игі істері көпке үлгі-өнеге. Бүгінгі шараның мақсаты да жастар арасындағы спортты дамыту. Осындай арда азаматтардың атқарған абыройлы істерінен үлгі көрсету», деді. Сонымен қатар Сейілхан Саттарханұлының жұбайы Сырлыкүл апа сөз сөйлеп, қатысушы спортшыларға сәттілік тіледі.
Жиын барысында орталықтың спорт саласында елеулі еңбек еткен азаматтар мен түрлі сала өкілдері сөз алып, ізгі тілектерін жеткізді. Сейілхан аға туралы естеліктерімен бөлісті.
Айта кетейік, 15 түрлі салмақ дәрежесі бойынша өтіп жатқан іс-шараның финалы 1- қазанда өтеді.
Естеріңізге сала кетейік, Сидней Олимпиадасының чемпионы, қазақтың талантты боксшысы марқұм Бекзат Саттархановтың әкесі Сейілхан Саттарханов 2020 жылы 25 ақпанда дүниеден озды. Айта кетейік, Сейілхан Саттарханов жары Сырлыкүлмен 4 бала тәрбиелеп өсірген. Балаларының барлығы да кішкентай кезінен спортқа жақын болған. Алайда олардың арасында Бекзат спортта үлкен жетістікке жетіп, небары 20 жасында Олимпиада шыңын бағындырды. Боксшы Сиднейде 57 келіге дейін салмақта өнер көрсетті. Саттарханов мансабында 143 жекпе-жек өткізіп, оның 132-сінде жеңіске жеткен. Жасындай жарқылдаған қазақтың дара ұлы 2000 жылы 31 желтоқсанда жол апатынан көз жұмды.
