Арыс қаласының Мәдениет үйінде күзгі әскерге шақыру науқаны аясында шақырылушылардың алғашқы командасын салтанатты шығарып салу рәсімі өтті.
Олар алдағы күндері облыстық жиын пунктінде қорытынды медициналық сараптамадан өтіп, мерзімді қызметін өткеру үшін әскери бөлімдерге жіберіледі.
Салтанатты шараға қала әкімінің орынбасары Алмаз Сұлтанов, Арыс гарнизонының бастығы полковник Көпжасар Ерназаров, қалалық біріктірілген қорғаныс істері жөніндегі басқармасының бастығы подполковник Ерлан Біләлов, қалалық ардагерлер қоғамдық бірлестігінің мүшелері, әскери қызметшілер, «Жас сарбаз» әскери-патриоттық сыныптарының тәрбиеленушілері мен мектеп оқушылары қатысты.
Жиналғандар болашақ сарбаздарға Отан алдындағы борышын адал атқарып, туып-өскен өлкесінің мақтанышы болыңдар деген тілек айтты.
Салтанатты шара Қарулы күштердің Ұлттық әскери-патриоттық орталығы шығармашылық ұжымының «Менің Отаным – менің Қазақстаным» атты патриоттық концерттік бағдарламасымен аяқталды.
