Биыл қазақ әдебиетінің қарымды қаламгері, заңғар жазушы, қоғам қайраткері, ғұлама ғалым Мұхтар Әуезовке 125 жыл. Осыған орай, Түркістан облыстық Ыбырай Алтынсарин атындағы балалар кітапханасында «Әуезов әлемі» тақырыбында облыстық семинар өтті.
Аталған семинардың алғашқы сөз кезегі кітапхана директоры, Қазақстанның педагогикалық академиясының профессоры Құдайбергенова Ақмарал Асанқызы мен жазушы, драматург, Қазақстанның Құрметті журналисі, Қазақстан жазушылар одағының мүшесі Захардин Қыстаубайұлына ұсынылды. «Қазақ театрындағы Әуезов драматургиясының орны» тақырыбында Ж.Шанин атындағы академиялық қазақ драма театры әдебиет бөлімінің меңгерушісі, белгілі драматург ҚР Мәдениет қайраткері Сая Қасымбек, «Мұхтар Әуезовтің Абай ұрпақтарымен байланысы» тақырыбында М.Әуезов атындағы ОҚУ-нің «Мұхтартану» ғылыми орталығының жоғары білікті маманы Әзімхан Исабек, «Мұхтар Әуезовтің әдеби әлемі» тақырыбында Созақ аудандық балалар кітапханасының меңгерушісі Маймақова Ғалия Сұлубекқызы, «Әуезов және әлем әдебиеті» тақырыбында Қазақстанның Халықаралық Жазушылар Ассосациасының мүшесі Өтеп Аида Рысбекқызы баяндама жасады.
Шымкент қалалық опера және балет театрының белді солисті, Халықаралық конкурстардың лауреаты Нуржан Жусипбековұлы ақын Абайдың «Көзімнің қарасы» әнін орындап, көпшілікті керемет күйге бөледі. Кітапхана қызметкерлері Анар Абдуллаева, Аида Өтеп және тұрақты оқырман Әуелбек Әшімжан «Шәмшіні іздеген Мұхтар» тақырыбында өлең оқыды.
Әуезов әлемi көзге көрiнбейтiн ғажайып ұлы сиқырымен, құдiретiмен ұлттық рух тәуелсiздiгiн қорғауға, сақтауға үйретедi! Келер ғасырда да кемелдене беретiн кемеңгер Мұхтар Әуезов – тек сiз бен бiздiң ғана емес, әлi дүниеге келмеген жаңа ұрпақтардың да сарқылмас игiлiгi, өлшеусiз бақыты. Өйткенi, Мұхтар Әуезов құдiретi оның елге деген шексiз махаббаты мен сенiмiнде жатыр. Осы бiр ақиқатты сезiну мына бiздерге, бүгiнгi тәуелсiз мемлекеттiң iргесiн нығайтып жатқан ұрпаққа қажымас қайрат, жасымас жiгер қосады. Өзінің ғажайып таланты, асқан еңбекқорлығы арқасында халқына қалтқысыз қызмет еткен, көркем сөздің шыңына шығып, соңына мәңгі өлмес мұра қалдырған әлемге әйгілі жазушыны дәріптеу — біздің абыройлы міндетіміз деп білеміз.
