Түркістан облысында ауыл шаруашылығы өнімінің көлемі артты. Нақты көлем индексі өткен жылмен салыстырғанда 4,4%-ға ұлғайды. Түркістан облысы әкімінің баспасөз қызметі осылай деп хабарлады.
Хабарламада, ағымдағы жылдың 7 айында Түркістан облысында ауыл шаруашылығының жалпы өнім көлемі жоспардан 27,2 млрд. теңгеге артық орындалып, 338,9 млрд. теңгені құраған жазылған. Ал нақты көлем индексі өткен жылмен салыстырғанда +4,4%-ға ұлғайды.
Жалпы егін саласында жиын-терім науқаны уақтылы ұйымдастырылып, астық мерзімінде жиналып алынды. Мал шаруашылығында ет, сүт өндіру және тауық жұмыртқасы былтырмен салыстырғанда сәйкесінше 0,6%-ға, 1%-ға және 10,6%-ға артық болып қалыптасты. Шетелге 121 мың тонна қауын, 170 мың тонна қарбыз экспортталғаны жазылған.
Облыс әкімі Өмірзақ Шөкеевтің тапсырмасымен өңірде ауыл шаруашылығы саласы өкілдеріне семинарлар өткізіліп келеді. Семинарларда кәсіпкерлерге, шаруаларға жаңа технологияларды енгізу жолдары түсіндіріліп, нәтижесінде тамшылатып және жаңбырлатып суғару тәсілдері кеңінен қолданысқа енгізілді.
Айта кетейік, өңірде мал басының өсімі соңғы екі жылда 13% артқан. Аналық ірі қара малды импорттау мен тұқымдық түрлендіру бойынша Түркістан өңірі мал шаруашылығының дамуы бойынша елімізде 2-орында. Бұл мақсатта үш жылда 20 мыңға жуық мал сатып алынған. 2 жылда жалпы мал өнімінің өсімі 8,5% артты. Елімізде экспортқа шығарылатын ірі қара мал етінің 75%, қой етінің 40% облыстың үлесінде.
Сондай-ақ, ағымдағы жылы ылғал үнемдеу технологиялары ендірілген алқап 4 000 гектарға жеткізіледі. Жылыжайлар көлемі қосымша 122 гектарға ұлғайтылып, жалпы 1 590 гектарды құрайды. 1 262 бірлік ауыл шаруашылығы техникалары алынып, 5%-ға жаңартылмақ.
Алдағы 5 жылда ауыл шаруашылығының жалпы өнім көлемін 1,3 трлн. теңгеге жеткізу жоспарлануда.
