Түркістан қаласында құрылыс жүргізуші мердігер компаниялар Құрылысшылар күні мерекесін өте мағыналы іспен өрнектеді. Олар төрт отбасына бақыт сыйлады. Дәлірек айтсақ, әлеуметтік қолдауға мұқтаж 4 отбасына баспана салып берді. Қала әкімі Нұрбол Тұрашбеков қиын жағдайда күн кешіп жүрген жандарды үймен қамтамасыз ету бастамасын көтеріп, құрылысшыларға ұсыныс жолдаған болатын. Ұсыныс қабылданып, бүгін құрылысшылардың кәсіби мерекесінде осы отбасылардың қуанышы еселенді.
– Бүгін біз өнегелі істің куәсі болып отырмыз. Ел ішінде: «Жамандық пайда етпейді, Жақсылық зая кетпейді» деген қанатты сөз бар. Қайырымды болу – адамның болмысына біткен ізгі амал. Маңайыңдағы адамдарға мейірімділік пен ізгілік таныту – адамгершіліктің белгісі. Ал, адамзаттың барлығына «бауырым» деп қарау Абайдан қалған өсиет. Осы өсиетке адалдық танытып, бүгінгі игі істің бастамашысы болған қаламыздағы құрылысшылар қауымына шынайы алғысымды білдіремін! – деп, мерекелік құттықтауын арнады.
Құрылысшылардың жомарт жүрегімен ұсынылған төрт баспананың кілтін жаңа иелеріне тапсырып, шаңырақтарына құт пен береке тіледі. Әр отбасыға ұсынылған үй үш бөлмеден тұрады, баспаналар қажетті жиһазбен тұрмыстық техникалармен қамтамасыз етілген,
Мерекелік жиын барысында құрылыс саласының үздіктері марапатталды.
Айта кетейік, тамыздың екінші жексенбісі — елімізде құрылысшылар күні. Кез келген елдiң экономикалық күш-қуаты мен әлеуметтiк тұрақтылығы құрылыс саласының дамуына тiкелей байланысты. Мемлекет басшысының қолдауымен Тәуелсiздiк жылдары елiмiзде құрылыс саласын дамытуға барынша жағдай жасалды. Қазір де Елімізде де, облысымызда да құрылыс тоқтаған емес. Отандық құрылыс индустриясы қанат жайып, құрылыс материалдарын шығаратын өндiрiс орындары да көбейдi. Түркістан облыс орталығы болғалы құрылыс алаңындағы жұмыстар бір сәтке бәсеңсіген емес. Карантин режимі кезінде де шаһардағы құрылыс жұмыстары жалғасып жатты. Өңір басшысы Өмірзақ Шөкеев «Сақтық шараларын сақтай отырып, құрылыс қарқынын үдете түсу керек», – деген болатын. Осы талаптың үдесінен шыққан құрылысшылардың ерен еңбектері бүгінде өз жемісін беруде.Үш жыл ішінде түрленіп, келбеті келісе түскен облыс орталығы әлі талай тамсандыратын болады.
Түркістанды түрлендіріп, жаңа келбетін қалыптастырушы – құрылысшылар. Яғни, көне қаланың жанынан жаңа ғимараттар салып, тарихқа өз қолтаңбасын қалдырып жатыр.
Аз уақыт ішінде адам танымастай өзгерген Түркістанның басты себепкерлері де осы мамандық иелері екені даусыз.
