10 тамыз — біртұтас қазақ баласын бірлікке шақыратын, адамгершілікке үндейтін, «біріңді қазақ, біріңді дос» тұтатын қастерлі Ұлы Абай күні! Адамзат шежіресінде кемеңгер, көсем адамдардың мың жылда бір туатындығын ойласақ, Абайдай данагөйдің дүниеге келуі қазақ халқының маңдайына бұйырған қайталанбас бақ!
Осы орайда, Түлкібас ауданының орталық кітапханасында қазақтың ұлы ақыны, ойшылы, композитор, қоғам қайраткері, қазақ жазба әдебиетінің негізін қалаушы Абай Құнанбаевтың туғанына 177 жыл толуына орай «Абай оқулары» атты көркемсөз оқу байқауы өткізілді.
Байқау: «Өлең — сөздің патшасы, сөз сарасы», «Абайдың қара сөздері», «Жүйріктен жүйрік озар жарысқанда» атты 3 кезеңнен тұрды. Қазылар алқасының шешімімен:
Түлкібас кенті кітапханасының оқырманы Оңкалбай Айдана бас жүлдеге лайық деп танылды;
Тастұмсық ауылдық кітапханасының оқырманы Шамболат Арайлым — 1 орын;
Ақбиік ауылдық кітапханасының оқырманы Сүлеймен Назерке — 2 орын;
Састөбе кенті кітапханасының оқырманы — Асылбек Аяулым және Майтөбе ауылдық кітапханасының оқырманы Сағындық Сұлтан — 3 орын иеленді.
Барлық байқауға қатысушыларға Алғыс хаттар беріліп, жеңімпаздар марапатталды.
Айта кетейік, «Абай оқулары» республикалық байқауы этнос жастары өкілдері арасында Қазақстан халқы тілдер күніне орай өткізіледі. Байқауды өткізудің мақсаты қазақ тілінің көркемдік ерекшелігін, бай сөздік қорын, Абай шығармашылығын насихаттау арқылы қазақтың тілі мен әдебиетіне, мәдениетіне деген этнос өкілдерінің ықыласын арттыру әрі еліміздің рухани бірлігін нығайту. Байқау мемлекеттік тілде өтеді. Байқау екі кезеңде өткізіледі. Бірінші кезең – облыс, қалаларда өтеді. Екінші кезең республикалық сайыс. Байқауға көркем сөз оқу және ән айту шеберлігін қатар игерген 18-22 жас аралығындағы Қазақстанның этнос өкілдері қатыса алады. Бұрынғы республикалық байқаудың жеңімпаздары мен жүлдегерлері (бас жүлде, І, ІІ, ІІІ орын иегерлері) осы байқауға қатыстырылмайды.
