Жуырда Түркия елінің Ыстамбул қаласында өткен Шығыс пен Батыс спортшылары арасындағы жекпе-жек сайысында Еліміздің намысын қорғаған Түркістан облысының қырандары – Онғарбаев Қыдырғали мен Сарыбай Ердәулет елге жеңіспен оралған болатын. Жеңімпаз спортшыларды жерлестері құрметпен қарсы алып, арнайы іс-шара ұйымдастырды.
«Елдің атын ер шығарады, ердің атын ел шығарады» демекші, іс-шара даңқты бапкер, чемпиондардың ұстазы Қарсыбаев Арман спортшыларды жеңістерімен құттықтап, әрқашан ел намысын абыроймен қорғай берулеріне тілектестік білдірді. Сөз соңында Түркістан облысы гір спорты және армрестлинг федерациясы президенті Қарсыбаев Арман өзінің және «Шардара Армспорт» ұжымы атынан Қыдырғалиға мен Ердәулетке Шардара қаласынан 2 бөлмелі пәтерлердің кілтін табыстады. Қыдырғали мен Ердәулет өз қуаныштарын жасыра алмай, ұлағатты ұстазына және барша «Шардара Армспорт» ұжымына, Шардара жұртшылығына өз алғыстарын білдірді.
Сонымен қатар Түркістан қаласында өңір басшысының тапсырмасымен инфрақұрылымды жақсарту жұмыстары жалғасуда.
Шаһар басшысы Нұрбол Тұрашбеков орталықтағы жұмыстар барысын бақылап, «Яссы» секторының І.Қожабаев көшесіндегі және «Бірлік» секторындағы балалар ойын алаңшаларын көріп, жұмыс сапасын тексерді.
Қазіргі таңда қаланың бірнеше аумағында балалар ойын алаңшалары мен стрит воркауттар, шағын ойын алаңшалары салынуда. Жыл басынан бері шаһарда оннан астам балалар ойын алаңшасы пайдалануға берілді. Жыл соңына дейін бұл көрсеткішті жиырмаға жеткізу көзделген. Атап айтқанда, «Яссы» мөлтек ауданындағы Сақ қорған көшесі, Баянауыл мектеп орны, Керей хан көшесінде, «Шауғар» мөлтек ауданындағы Ғ.Мұратбаев мектебі мен Абылай хан көшесінде жасақталуда. Сонымен бірге Кентау тас жолы бойы мен «Бекзат» секторында да балаларға арналған ойын алаңшалары салынып, тұрғындар игілігіне беріледі.
Түркістан облысы әкімінің баспасөз қызметі
