Түркістан облысының әкімі Өмірзақ Шөкеев жылыту маусымына дайындықты уақытылы аяқтауды тапсырды. Өңірде тұрғын үйлер мен әлеуметтік нысандар алдағы жылыту маусымына әзірленіп жатыр. Сондай-ақ алдағы қысқы маусымда көмір тапшылығын алдын алу мақсатында жұмыстар қолға алынған. Қазіргі уақытта қажетті отын қоры жинақталуда. Облыс әкімі Өмірзақ Шөкеевтің төрағалығымен өткен апталық аппарат отырысында 2022-2023 жылдардың жылыту маусымына дайындық жұмыстарының барысы талқыланды.
Облыс көлеміне жалпы көмір отынының қажеттілігі 900 мың тоннадан асады. Бюджеттік мекемелердің сұйық отынға (дизельге) қажеттілігі 4 559,7 мың литр, мазутқа қажеттілік 2700 тоннаны құрайды. Кентау қаласындағы ЖЭО-5 үшін қажетті көмір көлемі 89 мың тонна, мазут 700 тонна. Жылыту маусымына дайындау мақсатында негізгі және қосалқы жабдықтарға ағымдағы жөндеу жұмыстарына облыстық бюджеттен 300 млн. теңге бөлінген.
Өңірде орталықтандырылған жылумен қамтамасыз етілген 626 көпқабатты тұрғын үй мен 2561 бюджеттік мекемелер мен әлеуметтік нысандар бар.
Сонымен қатар, облыс орталығанда атқарылған жұмыстар қатарында қырым қанды безгегін қоздырушы кенемен күрес шаралары бар. Түркістан облысының әкімі Өмірзақ Шөкеевтің төрағалығымен өткен апталық аппарат отырысында конго-қырым қанды безгегі секілді аса қауіпті саналатын жұқпалы аурулардың алдын алу бойынша жасалып жатқан жұмыстар сараланды. Көктемгі кезеңде Түркістан облысында 1,4 млн бас ірі мал мен 4,5 млн бас ұсақ мал залалсыздандырылған. Мамандардың сараптау қорытындысы иньекциялаудың оң нәтиже бергенін анықтады. Маңызды шараның екінші кезеңі басталады. Бұл тұста үйіргелік қора-жайларды залалсыздандыруға басты назар аударылмақ.
Кенеге қарсы залалсыздандыру жұмыстарының сапасы мен тиімділігін анықтау бойынша аудан, қалаларда тиісті мекеме қызметкерлерінің қатысуымен арнайы комиссия құрылған. Олардың жұмыстары қатаң қадағалауда болады. Сала мамандары елдегі карантин кезінде халықтың шоғырлануы тоқтап, көрсеткіш жақсарғанын айтады. Конго-қырым қанды безгегінің табиғи ошақтарында орналасқан елді-мекендерді қорғау бойынша жоспарлы шаралар биыл да жалғасады.
Түркістан облысы әкімінің баспасөз қызметі
