Германиядағы Кеңес әскерлері тобының ардагерлері Шымкентте бас қосты. Олар Германиямен қоса Польшада әскери борышын өтеген. Ардагерлер Даңқ мемориалына гүл шоқтарын қойып, кешенмен танысты, өзара әңгіме-дүкен құрды.
– Біз Варшава келісімі және Германиядағы Кеңес әскерлері тобының ардагерлеріміз. Екінші дүниежүзілік соғыс аяқталған соң Батыс елдерінде әскери борышымызды өтедік. Бас қосудағы мақсатымыз – Ұлы Отан соғысындағы батыр аталарымыздың рухын ардақтау. Өскелең ұрпаққа Отансүйгіштік тәрбие беру. Осы бағытта мектептерде және жоғарғы оқу орындарында тиісті тәрбие жұмыстарын атқарып келеміз. Ал бүгін Шымкент қалалық және Түркістан облыстық ардагерлер ұйымының мүшелері жаппай танысып, пікір алмасуға келдік, – дейді Варшава келісімі және Германиядағы Кеңес әскерлері тобы ардагерлерінің Шымкент қалалық қоғамдық бірлестігінің төрағасы Үсенбатыр Арзықұлов.
Жалпы ардагерлердің айтуынша, қоғамдық ұйымның құрылғанына билы 8 ай болды. Ал алдағы уақытта жыл сайын 9 маусым күні бас қосып, осы бір даталы күнді атап өтпек ниет бар екен. 1945 жылы 9 маусым күні маршал Жуковтың бұйрығымен Германия жеріндегі Кеңес әскерінің тобы құрылған. Ардагерлер ұйымы — қариялардың қоғамнан тыс қалмауын қамтамасыз етеді. Қариясы бар ел – қазыналы деп бекер айтылмағаны анық. Яғни ақылды қария – ағып жатқан дария. Демек ақсақалдардың тәрбие тұрғырында да орны жоғары. Осылайша ұлт болашағына бей-жай қарай алмайтын қариялар жастарға тәлім – тәрбие беру үшін барын салып жүр.
