Словакияның Братислава қаласында байдарка мен каноэда спортынан жастар арасындағы ірі халықаралық жарыс өтті. Дүбірлі сында Түркістан облыстық ССТ ОРМБЖСМ спортшылары Полат Тұребеков пен Антон Сергеев каноэ-екілікте 500 метр қашықтықта күміс жүлдеге, каноэ-екілікте 1000 және 200 метр қашықтықта екі қола жүлдеге қол жеткізді.
Жарысқа 15 елдің және Еуропаның ең мықты 13 клубының таңдаулы 300 спортшысы қатысты. Байдарка мен каноэдан жастар арасындағы халықаралық регата – бұл келешекте ірі додаларға, оның ішінде Олимпиада ойындарына жүлделерге таласатын жас дарындарды табу мақсатымен өткізілетін дәстүрлі жарыс.
Қазақстан құрамасы сапында осы екі спортшы жүлдегер атанды. Оларды сайысқа каноэда есу бойынша Түркістан облысының аға жаттықтырушысы Е.Кеңесов пен Қазақстанның еңбегі сіңген жаттықтырушысы С.Сергеев даярлады.
Бүгінде Түркістан облысының әкімі Өмірзақ Шөкеевтің тікелей қолдауымен су спорты түрлерін дамытуға жағдай жасалып жатыр. Халықаралық талапқа сай ескек есу базасы салынды. Алдағы уақытта пайдалануға беріледі деп жоспарланып отыр.Халықаралық дәрежедегі ескек есу жəне байдарка спорты бойынша олимпиадалық стандартқа сай орталық 100 гектарға жуық алаңда орналасады. Каналдың беткі ауданы 47,9 га. Жалпы ұзындығы – 2222 м. Каналдың ені 260 м, тереңдігі 4 м. Толық сараптау жүргізіліп, концепциялық жоба әзірленген.
Спорт кешенінде қонақүй, веложолақ, бассейн, эллинг, каноэге арналған пирстер, көрермендерге арналған табло, трибуналар, аралдарды қосатын көпір және тағы басқа нысандар орналасады. Жаңа жоба Кенсай-Қосқорған-2 су қоймасынан әкімшілік-іскерлік орталығындағы 9 және 11 көшеде құрылысы жүргізіліп жатқан канал арқылы келетін жеткізгіш арна болмақ. Есу каналынан Шошқакөл су жүйесіне дейін жеткізу-шығару арнасы болады.
