Жетісай ауданында жалпы саны 7 мыңнан астам мүмкіндігі шектеулі жандар бар. Олардың 1167-сі 18 жасқа дейінгі жастар. Олардың 340-ы Жетісай аудандық жұмыспен қамту және әлеуметтік бағдарламалар бөлімінің есебінен алынған. Буыны бекімей жатып мүгедектіктің қамытын киген бүлдіршіндер «Психоневрологиялық ауытқуы бар және тірек-қимыл аппараты бұзылған мүгедек балаларға арналған «Балдәурен» орталығында» үздіксіз ем қабылдайды. Оларға онда барлық жағдай жасалған.
Бүлдіршіндердің мүмкіндігі шектеулі болса да өмірге деген құлшыныстары жоғары. Аудандағы емдеу орталығында бүлдіршіндердің денсаулығын түзету үшін барлық жағдай жасалған. Оларды өмірге бейімдеу үшін білікті мамандар көмектеседі. Орталық қажетті жаттығу құрылғыларымен жабдықталған. Балдаурегне бас сұққан Жетісай ауданының әкімі Жамантай Бейсенбаев пен аудандық жұмыспен қамту және әлеуметтік бағдарламалар бөлімінің басшысы Әділхан Әбжанов жастарға тарту-таралғы жасады.
Кәсіпорын және қоғамдық ұйымдар да әрдайым қайрымдылық көмектерін көрсетіп тұрады. «Өмірдің сынына ұшырап, тағдырдың тауқыметін татып отырған бүлдіршіндеріміздің бақытты күлкісін, қуанышты жүздерін көруден, соған мүмкіндік жасаудан артық бақыт жоқ шығар біз үшін»,- деген аудан басшысы қайырымдылық шарасына ат салысып жүрген кәсіпкерлерге алғыс хат табыстады.Түркістан облысының әкімі Өмірзақ Шөкеевтің бастамасымен қолға алған «Қамқорлық» бағдарламасы аясында ірі компания өкілдері мен шифер зауыты жетісайлық 150 отбасыға химиялық тұтыну заттарын топтастырылған 1 млн 700 мың теңгенің азық-түлік себеттерін үлестірген болатын. Бұл жолғы қайырымдылық шарасынада 3 млн 740 мың теңге қаражат жиналыпты.
Ақпарат: shymkenttv.kz
