1 маусым – Халықаралық балаларды қорғау күні мерекесіне орай Түркістан облысының қоғамдық денсаулық басқармасына қарасты барлық медициналық мекемелерде балаларға ашық есік күні мен мерекелік іс-шаралар өткізілді. Бұл туралы Түркістан облысы әкімінің баспасөз қызметі мәлімдеді.
Түркістан облысының педиатр, онколог, кардиохирург, кардиолог, сурдолог, хирург, уролог, нейрохирург, травматолог- ортопед, ЛОР дәрігері, эндокринолог, нефролог, невролог, сурдолог, офтальмолог, гастроэнтеролог, аллерголог психолог және логопед мамандары балаларға қабылдау жүргізді.
Іс-шараға қатысқан балалар негізінен педиатр, кардиолог,невролог, офтальмолог, ЛОР дәрігерлеріне көптеп қаралды. Балаларды жан-жақты тексеруден өткізген білікті мамандар қажетті ем-домдар жазып беріп, пайдалы ақыл-кеңестерімен бөлісті. Бұл күні облыс бойынша жалпы 2 мыңға жуық бала қаралды. Мерекелік іс-шара барысында концерттік бағдарламалар жүргізіліп, сыйлықтар тарту етілді.
Мемлекет басшысы Қасым-Жомарт Кемелұлы Тоқаев 2022 жылды «Балалар жылы» деп жариялаған болатын. Осыған байланысты Түркістан облысы әкімдігінің кешенді жоспары бекітілген. Оның 3-бөлімінде балалардың және мүмкіндіктері шектеулі балалардың денсаулығын нығайту мен қорғау шараларын іске асыру жоспарланған. Балалардың денсаулығын жақсарту, мақсатында Түркістан облысының қоғамдық денсаулық басқармасы балаларға арналған оңалту төсек орындарын көбейтуде. Қазіргі таңда 613 оңалту төсек-орны бар, соның ішінде балаларға арналған үш оңалту орталығы, бір шипажай мен екі «Қамқорлық» орталығы қызмет атқарып жатыр.
