Шымкент қаласының әкімі Мұрат Әйтенов қаланың дамуы мен тазалығына атсалысып жүрген Әл-Фараби ауданының белсенді азаматтарымен кездесті.
Қала әкімі тұрғындар көтерген әрбір мәселенің орындалуы өз бақылауында болатынын айтты. Қала басшысы бүгінгі кездесуде айтылған ұсыныстар мен өтініштер негізінде тиісті сала басшыларына нақты тапсырмалар берді.
Бұған дейін болған кездесулерде жалпы 68 мәселе көтерілген болатын. Бүгінде оның 28-і толық орындалып, тұрғындардың өтініші қанағаттандырылған еді. Ал бүгінде 29 тапсырма орындалу үстінде. Сондай-ақ, тұрғындардың 5 өтініші тұрақты бақылауды қажет етсе, 2 ұсыныс келесі жылы жүзеге асырылмақ. Тұрғындар өтініш талаптарының орындалып жатқандарына дән риза. Одан өзге халықтың жүріп тұруын қамтамасыз ету мақсатында қоғамдық көліктердің де қатары толыға түсуде. Яғни мәселен «Сәуле» шағын ауданынан жүретін қоғамдық көліктердің «Қазығұрт» шағын ауданына дейін ұзарту туралы өтініш берілген болатын. Нәтижесінде №96 және №43 маршруттардың қозғалыс сызбасы өзгертіліп, тұрғындарға қолайлы етіп жасалды.
Сондай-ақ, 195 орамдағы Қырыққыз көшесін жарықтандыру бойынша ұсыныс бірден назарға алынып, құрылыс-монтаждау жұмыстары жүргізілді. Бүгінде аталған көшеге 31 жарық шамдары орнатылды. Игі істерге халық дән риза.
Ал, Әл-Фараби ауданының үй басқарушылары мен белсенді азаматтарынан құрылған кеңесте инфрақұрылым, жол, қоғамдық көлік, тазалық сынды әлеуметтік мәселелер шешімін табуда.
Шымкент қаласы әкімдігінің баспасөз қызметі
