Шымкент гарнизонында Қорғаныс министрлігінің ақпараттық-түсіндіру тобы «Күшіміз-бірлікте» әскери-патриоттық акциясын өткізді
Акция аясында Қорғаныс министрлігінің әскери-тарихи музейінің тақырыптық экспозициялары ұйымдастырылды, онда қонақтар Бауыржан Момышұлының жеке заттарын өз көздерімен көріп, лейтенант Рақымжан Қошқарбаевтың Рейхстагқа шабуыл жасау схемасының көшірмесімен және ұрыс даласынан табылған басқа да экспонаттармен танысты.
Көрме қонақтары Ұлы Отан соғысына қатысқан атақты қазақстандықтардың өмірінен көптеген қызықты фактілерді білді.
Акцияға гарнизонның әскери қызметшілері, олардың отбасы мүшелері, жергілікті атқарушы органдардың, Қазақстан халқы Ассамблеясының қалалық филиалының өкілдері, Шымкент ардагерлер қоғамының, «Nur Otan» партиясының мүшелері және қалалық мәслихат депутаттары қатысты.
Сондай-ақ, іс-шара барысында Қорғаныс министрлігінің ақпараттық-түсіндіру тобының мүшелері әскери ұжымдардағы моральдық ахуалды зерделеу бойынша кешенді жұмыс жүргізді. Әскери заңгерлер әскери қызметшілердің жеке құрамы мен отбасыларына заңнамада көзделген әлеуметтік кепілдіктерді іске асыру мәселелері бойынша кеңес берді.
Шымкент гарнизонының баспасөз қызметі
