Ел Президенті Қасым-Жомарт Тоқаевтың Жарлығымен Түркістан облысынан төтенше жағдай режимі алынып тасталды. Бірлігі мен тыныштығын сақтап қалған облыста коменданттық сағат тәртібі тоқтатылғандықтан блок бекеттердің де жұмысы аяқталуда. Түркістан облысының әкімі Өмірзақ Шөкеев Ордабасы ауданы, Қайнар елді мекеніндегі блок бекетінің жабылу сәтіне қатысып, тәртіп сақшылары мен БАҚ өкілдерімен кездесті. Өңірдегі жағдайды саралады.
– Мемлекет басшысының Жарлығына сәйкес Түркістан облысы мен Шымкент қаласында төтенше жағдай тоқтатылды. Соған байланысты біздің облысымыздағы қырықтан астам блок бекет алынып тасталады. Бірақ Жамбыл және Қызылорда облысымен шекаралас аумақтағы блок бекеттер әзірше қалады. Өйткені ол өңірлерде төтенше жағдай режимі әлі алынған жоқ. Ауданаралық бекеттің бәрі жұмысын тоқтатты. Тұрғындарға, жолаушыларға еркін жол жүруге мүмкіндік беріледі. Жалпы төтенше жағдай кезінде блок бекеттер арқылы біраз нәтижелерге қол жеткіздік. 30 мыңдай автокөлік тексерілді. Біразынан Алматы, Шымкент қалаларында болған оқиғаларға қатысқан, қару-жарақпен жүрген азаматтар ұсталды. Облыс бойынша 16 қылмыстық іс қозғалған. Бейбіт шеруге қатысқандарға түсіндірме жұмыстары жүргізілді, кейбіріне әкімшілік шара қолданылып, бәрі үйлеріне қайтарылды. Жағдай толығымен тұрақталды, – деді Өмірзақ Шөкеев.
Облыс басшысы дәстүрге сай ауданға сапар барысында жергілікті ардагерлер, зиялы қауым өкілдері, белсенді тұрғындармен кездесу өткізді. Жиында өңір басшысы «Президентіміздің тапсырмасына сәйкес елімізде жанар жағармайдың бағасы тұрақталды. Ендігі кезекте қымбатшылыққа, жұмыссыздыққа қарсы іс-шараларды жандандыра түсуіміз керек. Әсіресе жастарды кәсіпкерлікке баулудың маңызы зор. Әрине жұрттың бәрі кәсіпкер бола алмайды. Бірақ жергілікті жастардың арасынан кәсіпкерлікке бейім жастарды іздеп тауып, олардың идеяларына қолдау білдірген жөн. Жастарға жағдай жасалса, олар да тұрғындарды жұмыспен қамтып, ел дамитын болады. Елімізде дамуға, еңбек етуге толық мүмкіндік бар. Ауыл шаруашылығын дамыту, оның ішінде суды үнемдейтін тәсілдерді батыл жүзеге асыру қажет. Жалпы облысымызда газдандыру, инфрақұрылымын жақсарту жұмысы жүріп жатыр. Түркістан қаласына ағын су тарту көздерін таптық. Су қоймалары салынды. Бірлесіп жұмыс істесек, елдің де еңсесі тіктеле түсетіні анық» дей келе жергілікті тұрғындардың өтініштері мен ұсыныстарын тыңдады. Сонымен бірге елімізде коронавирус індеті қайта күшейгенін айтып, санитарлық талаптарды қатаң сақтау керектігін де атап өтті.
Ордабасылықтар ағын су, жұмыспен қамту және өзге де мәселелерді қозғады. Бірлік пен ынтымақтың туы тігілген Ордабасы өңірінің тұрғындары, ел ағалары ел тыныштығының маңызды екеніне тоқталып, облыста қолға алынған жобаларға сәттілік тіледі. Өңір басшысы осы күні аудан орталығында ашылған халыққа қызмет көрсету орталығында болды. Оған жаңа технологиялардың көмегімен жүзеге асып жатқан мүмкіндіктер таныстырылды. Сондай — ақ облыс әкімі
Шұбарсу ауылындағы Б.Нұрлыбеков атындағы жалпы орта мектебінің жаңадан салынған 200 орындық оқу корпусымен танысты. Бұл мектеп ауылға Өзбекстаннан қандастардың көптеп көшіп келуіне және демографиялық өсімнің жоғарылауына байланысты жаңартылып, кеңейтіліп отыр.
Түркістан облысы әкімінің баспасөз қызметі
