Ауыл шаруашылығын дамытуға жыл сайын субсидия мен басқа да мемлекеттік қаржылай қолдаулар көрсетілуде.
Аталған саланы субсидиялау барысы мен тәсілдерімен Шымкент қаласындағы кәсіпкерлерді кеңінен ақпараттандыру мақсатында Сыбайлас жемқорлыққа қарсы іс-қимыл Агенттігінің Шымкент қаласы бойынша департаменті мен қалалық ауыл шаруашылығы және ветеринария басқармасы бірлесе кездесулер ұйымдастыруда.
Кезекті іс-шара М.Әуезов атындағы ОҚУ ғимаратында ауыл шаруашылығы және ветеринария басқармасы басшысының орынбасары А.Джанбатыровтың, Департаменттің өкілі Ж.Қамбардың, қалалық ауыл шаруашылығы кооперативтері қауымдастығының төрағасы Е.Сатқанбаев, «Nur Otan» партиясының қалалық филиалының өкілдері мен кәсіпкерлердің қатысуымен өтті.
Дөңгелек үстелде Департамент өкілі Ж.Қамбар бүгінгі кездесу субсидия бойынша кеңінен ақпарат беруге арналғанын жеткізді. Себебі, спикердің айтуынша Агенттікпен ауыл шаруашылығын субсидиялау саласындағы сыбайлас жемқорлық тәуекелдеріне кешенді талдау жүргізілгендігін атап өтіп, нәтижесінде көптеген кәсіпкерлердің субсидиялар алу түрлері мен тәртібін білмейтіндігі анықталған.
Өз кезегінде Басқарма тарапынан ауыл шаруашылығын мемлекеттік қолдаулар мен субсидиялауға қатысты ақпараттар беріп, сұрақтар туындаған жағдайда 8(7252) 24-75-40, 24-75-34, 24-74-08 телефон нөмірлеріне хабарласуға шақырды.
Сонымен қатар, жиында сыбайлас жемқорлық көріністеріне тап болған кез келген азамат Агенттіктің 1424 нөмірі бойынша CaII-орталыққа немесе Департаментке хабарласа алатындығы жеткізілді.
Айта кетейік, сыбайлас жемқорлық құқық бұзушылық фактісі туралы хабарлаған немесе сыбайлас жемқорлыққа қарсы іс-қимылда өзге де жолмен жәрдемдесетін адамдарға біржолғы ақшалай сыйақы түрінде көтермелеу заңнамалық түрде белгіленген. Көтермелеу адам берген ақпарат шындыққа сәйкес болса және айыпты адамға қатысты сот үкімі заңды күшіне енген жағдайда жүзеге асырылады.
