Бүгін Түркістандағы облыстық «Фараб» әмбебап ғылыми кітапханасында белгілі жазушы, драматург Алишер Рахаттың оқырманмен кездесуі өтті. Шараны Түркістан қалалық педагогика гуманитарлық, техникалық колледжінің аға оқытушысы, ардагер Уголжан Якубовна ашып берді.
Кеш барысында жазушының қаламынан туған «Parallel» кітабының тұсауы кесілді. Кітаптың тұсауын Қазақстан Журналистер одағының мүшесі, «Түркістан» газетінің редакция меңгерушісі Ләззат Сарыбаева кесіп, кеш туралы әсерімен бөлісті.
«Параллель» – махаббат туралы роман. Автор кітап атауына тоқталып өтті. Романда кейіпкер өміріндегі қатар болып жатқан оқиғалар көрініс табады. Кітаптың ішіне енген жан екі түрлі әлемге куә болады. Бірі өзіне жақсы таныс қала келбеті мен сондағы жастар әлемі. Енді бірі жалғыз адамның ішіндегі ешкімге айта алмайтын өзіне тән жан әлемі. Яғни, бізге бейтаныс бөгде әлем.
Шара соңында кітапхана директоры Жанат Сәдібекқызы кеш кейіпкері – Алишер Рахатқа арнайы сый табыстап, келген оқырманға алғысын білдірді. Әдеби кеш көпке ой салып, рухани демалыс сыйлады.
Алишер Рахат – қазақстандық жазушы, драматург, «Дәктіл» журналының қазақша редакциясының редакторы Т. Жүргенов атындағы Қазақ ұлттық өнер академиясының «кинотеледраматургия» мамандығын бітірген. Мұхтар Әуезов атындағы Қазақ академиялық драма театры жас драматургтер арасында өткізген байқауының (2015), Шығыс Қазақстан облысының Дін істері басқармасының ұйымдастыруымен «Терроризмге қарсы драмалық шығарма» байқауының жеңімпазы (2017), «Тәуелсіздік толғауы» республикалық байқауының «Отбасы құндылықтарын айшықтайтын ең үздік пьеса» аталымының иегері (2017), «Драма.KZ» заманауи драматургия фестивалінің финалисті (2018), «Алтын тобылғы» әдеби байқауының «Жылдың үздік драматургиясы» аталымы бойынша жеңімпазы (2021). Ташкент қаласында өткен «IV Театр жастары форумының» қатысушысы (2021). Бірқатар пьесалары қазақстандық театрлардың сахнасында қойылды. Шығармалары «Қазақ әдебиеті», «Жас Алаш» газеттерінде, «Әдебиет порталы», «Мәдениет порталы», «Қаламгер» сайттарында, «Адырна» және «Литерра» журналдарында жарияланған. «Махаббатым – constant» және «Параллель» романдарының авторы (2019, 2022). Әңгімелері орыс, түрік, ағылшын тілдеріне аударылған. «Burshaq» шығармашылық бірлестігінің негізін қалаушылардың бірі.
