Корея Республикасының Президенті Юн Сок Ёльдің Қазақстанға мемлекеттік сапарына орай 12 маусым күні елордада қазақ-корей бизнес-форумы өтеді.
Алдын ала мәліметтер бойынша форумға екі елдің мемлекет басшылары, сондай-ақ іскерлік кеңестің тең төрағасы ретінде «Самұрық-Қазына» АҚ басқарма төрағасы Нұрлан Жақыпов пен Кореяның халықаралық сауда қауымдастығының төрағасы Джин Сик Юн қатысады.
Пленарлық отырыс барысында Hyundai Motor Russia&CIS өңірлік штабы басшысының орынбасары Им Дже У, «Astana Motors» компаниясының бас директоры Бекнұр Несіпбаев, Doosan Enerbility вице-президенті Янг Юн Хо, «Қазақстан темір жолы» ҰҚ» АҚ Басқарма төрағасының орынбасары Әнуар Ахметжанов және басқа да ірі компаниялардың басшылығы баяндама жасайды.
Беснес-форум соңында бірқатар коммерциялық құжатқа қол қою жоспарланған.
Осыған дейін «Самұрық-Қазына» АҚ бұл іс-шараға 50-ден астам компания қатысатынын хабарлаған еді. Олардың қатарында Samsung, LS Corporation, Posco Holding бар. Жалпы, форумға екі елден 300-ге жуық бизнес өкілі қатыспақ.
Бұдан бұрын хабарланғандай, Мемлекет басшысы Қасым-Жомарт Тоқаевтың шақыруымен биылғы 11-13 маусым күндері Корея Республикасының Президенті Юн Сок Ёль Қазақстанға мемлекеттік сапармен келеді.
Екі ел басшылары келіссөз жүргізеді және қазақ-корей бизнес-форумына қатысады деп жоспарланып отыр. Бүгінде екі ел арасындағы қарым-қатынас жоғары деңгейде дамып келеді. Көптеген кореялық компания Қазақстан экономикасына инвестиция құйып, жұмыс орындарының ашылуына және өнеркәсіптің өркендеуіне ықпал етіп отыр. Бұдан бөлек, корея¬лық инвесторлар Үлкен Алматы айналма автомобиль жолы, бу-газ электр стансасының құрылысы сияқты ірі жоба¬ларға қатысып, Қазақстанның ұлт¬тық инфрақұрылымын дамытуға өз үлес¬терін қосып келеді.
