Түркістан облысының Қазығұрт ауданы Қақпақ ауылында балаларға арналған қайырымдылық спорт залы ашылды. Бұл туралы «Қазақстан халқына» қорының баспасөз қызметі хабарлады.
«Қазақстан халқына» қорының жобасы аясында ауыл балалары спорт секцияларына тегін қатыса алады. Жаңа спорт залы жергілікті мектеп аумағында ашылды. Зал бөлмесі мектеп балансында. Осыған дейін ауыл балалары күрес үйірмесіне барғанымен, тұрақты жаттығулар өткізу үшін қажетті жағдай жасалмаған еді. Сондықтан тұрғындар, әсіресе, балалар жаңа залдың ашылуын асыға күтті. Мұнда барлық заманауи талапқа сәйкес жабдықтар қарастырылған.
«Қазақстан халқына» қорының қолдауымен үй-жай қажетті заманауи жабдықтармен, спорттық мүкәммалмен және жаттығуға арналған құрал-жабдықтармен жарақтандырылды. Жаңа спорт залда 80 бала еркін күреспен айналысуды бастап кетті. Бұдан өзе жаңа залда бокс секциясы ашлады деп күтілуде. Оған балаларды қабылдау науқаны да басталды. Қақпақ ауылындағы бұл нысан — «Қазақстан халқына» қоғамдық қорының «Батыр боламын» қорымен серіктестікте «24 балалар спорт залы» қайырымдылық жобасы аясында ашылып отыр. Яғни бұл зал 24-тің ішіндегі тоғызыншы спорт залы. Бұл жоба алдағы уақытта жалғасын табатын болады.
Еске сала кетсек, «Қазақстан халқына» қоры бастамашылық еткен «24 балалар спорт залы» қайырымдылық жобасы еліміздің шалғайдағы елді мекендерінде немесе спортқа қолжетімділік деңгейі төмен ауылдық жерлерде балалар спортының қолжетімділігін арттыруға бағытталған. Жобаның мақсатты аудиториясы – аз қамтылған және көп балалы отбасылардан шыққан 5 жастан 18 жасқа дейінгі балалар, сондай-ақ даму ерекшелігі (инклюзивтілігі) бар жеткіншектерге спортпен айналысуға жағдай жасау. Бүгінде 24 залды ашуға қор 183 623 000 теңге көлемде қаржы бөлу қаралған.
